Fundargerð stjórnar Skógræktarfélags Hafnarfjarðar (2/2026)
Haldinn í Selinu þann 11. mars 2026, kl 17.30
Mætt: Sigurður Einarsson (formaður), Árni Þórólfsson, Hallgrímur Jónasson (ritari), Ingvar Viktorsson, Jónatan Garðarsson, Gyða Hauksdóttir ásamt Steinari Björgvinssyni framkvæmdastjóra.
1 Stöðuyfirlit
Að undanförnu hefur verið unnið að grisjun í Selhöfða, um er að ræða stafafuru sem var gróðursett upp úr 1980. Félagið er með samning við bæinn um að sanda og salta göngustíga um 7 km leið. Félagið keypti nýtt 6 hjól sem hefur nýst vel við vinnu að undanförnu.
Starfsmenn félagsins hittu Þórarinn Ívarsson frá Veraldarvinum (Worlswide friends) fyrir skömmu, en samtökin eru óhagnaðardrifin samtök um sjálfbærni og frið. Samtökin eru tilbúin til að vinna með félaginu og leggja til sjálfboðaliða til að vinna fyrir félagið í sumar.
2. Aðalfundur
Aðalfundur félagsins verður haldinn þann 14. apríl, kl. 20:00 í Hafnarborg. Rætt var hvort rétt er að alda fundinn að kvöldi til, en þátttaka í aðalfundum hefur dvínað. Rætt var um hvaða leiðir eru helstar til að kynna fundinn betur. Gert er ráð fyrir hefðbundnum aðalfundarstörfum, en að eftir hlé verði fjallað um eldvarnir á skógræktarsvæðum, til þess fenginn t.d. slökkviliðsmaður með reynslu, auk þess sem starfsmenn félagsins leggi inn reynslu sína af slökkvistarfi og að fjallað verði um hvernig félagið á að vera sem best undirbúið til að takast á við slíka hættu.
Úr stjórn eiga að ganga Sigurður Einarsson, Árni Þórólfsson og Ingvar Viktorsson, allir gefa kost á sér til áframhaldandi stjórnarsetu.
3. Fulltrúafundur Skógræktarfélags Íslands
Fulltrúaráðsfundur SÍ verður haldinn laugardaginn 28. mars n.k. í aðstöðu hjá Íshestum.
Jónatan Garðarsson (formaður SÍ) mun setja fundinn síðan verður fjallað um stefnumótun, nýja hvata og stuðningsaðgerðir L&S, stöðu Landgræðsluskóga o. fl. Gerð verður grein fyrir 80 ára sögu Skógræktarfélags Hafnarfjarðar (SH), áður en skógræktarsvæði SH verður heimsótt, auk þess sem boðið verður uppá léttar veitingar. á vegum SH.
4. Samningurinn við bæinn – fundur með bæjarstjóra
Sigurður, Jónatan og Árni hittu Valdimar Víðisson, bæjarstjóra og Sigurð Haraldsson sviðsstjóra umhverfis- og skipulagssviðs í gær til að fara yfir samning bæjarins við félagið. Á fundinum var m.a. lagt fram skjal sem Árni gjaldkeri tók saman, en þar er gerður samanburður eftir árum á framlagi bæjarins og framreiknuðu framlagi miðað við verðlag og sýnt fram á hve framlögin hafa rýrnað. Fulltrúar bæjarins tóku erindinu vel og gert er ráð fyrir að þjónustusamningurinn verði endurnýjaður/uppfærður sem fyrst.
5. Aðalskipulagsbreyting – athugasemdir
Í Skipulagsgáttinni er tillaga að breytingu á deiliskipulagi Snókalanda, vegna norðurljósa- og stjörnuskoðunarsvæðis við Bláfjallaveg, sjá auglýsingu nr. 0187/2026. Farið var yfir deiliskipulagsbreytinguna, gögnin skoðuð og niðurstaðan er að félagið gerir enga athugasemd við þessa breytingu.
6. Skógræktarsvæðið við Krýsuvíkurveg – staða
Afkomendur þriggja af fjórum frumkvöðlum sem hófu gróðursetningu í landi Skógræktar ríkisins í hrauninu nærri Hrauntungum í Almenningum rétt eftir 1950, komu á fund í húsnæði SH þann 11. febrúar 2026. Starfsmenn og fulltrúar stjórnar SH tóku á móti þeim til að ræða þá hugmynd hvort það geti verið æskilegt að opna skóginn fyrir gestum og gangandi. Svæðið kalla þau Hraunið, en það hefur líka verið kallað Hrauntunguskógur. Þarna byrjuðu fjórir vinir ræktunarstarf ásamt fjölskyldum sínum og gerðu samning við Skógrækt ríkisins til að kanna hvort hægt væri að rækta skóg í hrauni. Þessir samningar eru ígildi erfðafestusamnings sem afkomendurnir eiga réttin á. Nokkrum árum eftir að þessir fjórmenningar hófu skógrækt sína bættust fleiri í hópinn um leið og ræktunarlandið var stækkað. Það spannar á milli 50 og 55 ha. Þarna hefur vaxið upp myndarlegur skógur sem samanstendur fyrst og fremst af greni og furu, en einnig hefur birki, víðir og einir tekið vaxtakipp eftir að landið var girt og að mestu friðað fyrir beit. Á undanförnum árum hafa verið gerðir nokkrir stígar á svæðinu en skógurinn er víða mjög þéttvaxinn og þyrfti að grisja hann. Rætt var um það hvort það sé tímabært að bæta aðgengið þannig að útivistarfólk geti notið þess að heimsækja hann. Fundurinn snerist fyrst og fremst um það með hvaða hætti væri hægt að koma þessu í kring, og ef af því verður, hvort SH sjái flöt á því að koma að því verkefni með þeim. Þetta er háð því að allir afkomendur frumkvöðlanna séu sáttir við að fara þessa leið. Málið er á upphafsreit og ekki ljóst hvernig þetta þróast.